跳跳~23-24個月大－HeidiPeter1995的部落格

一個貪睡的媽媽，因為抵擋不住周公的引誘，每次暗完跳跳瞓覺，自己都睡呼嚕嚕﹗連blog都寫唔切，所以今次一次過寫兩個月﹗

跳跳响呢一兩個月的進展相約，主要响說話、表達能力方面進步咗，其次都係佢的脾氣，比之前更懂得扭計；而跳跳巳經步入trouble two的年齡，正正就係因為佢識嘢咗，好多時都因為佢自己嘅想法同我地唔同而扭計，呢樣嘢真係時時都要同佢鬥智鬥力，唔可以太遷就之餘又要令佢明白一些道理，做父母真係時時刻刻都在學習中。

在跳跳步入22個月大時都巳經開始用短句表達自己，而家就可以有簡單的對答，例如問佢：你係咪鍾意食餅餅？佢話：係呀﹗“bb食餅餅”。當我返屋企時問佢，食咗奶奶未，佢話冇﹗(其實巳經食咗) 問佢疴咗poopoo未，佢又話冇，其實疴咗兩次﹗所有講完“冇”時，佢都會笑，係咪玩嘢？因為仍然夾雜著bb話，有時真係聽唔清楚佢講咩，我會試吓問佢，係咪xx呀？如果我講嘅嘢唔係佢心目中的，佢就會答：唔係呀﹗我估多兩次都估唔中，佢就會唔再講，跟著行開。又如果心情唔好，佢就會扭計，喊﹗不過而家最唔好嘅係佢仍然食奶咀，尤其是瞓覺時，冇就瞓唔著咁。有時佢食著個奶咀講嘢，我會話：媽媽聽唔倒你講咩(聽倒都話聽唔倒)，你除下個奶咀先講啦﹗咁佢就會除下奶咀同我講嘢，而我就將奶咀拿走。其實佢而家的確食少咗，好多時係佢自己話唔食。不過，佢自己一扭計/在街上見到陌生人怕羞時，就立即話要奶咀。我個standard答案係“出街冇奶咀喎﹗”“去公園冇奶咀喎﹗”等等。所以當有街街去時，佢唔會要奶咀，要都冇用，阿媽我話冇，呢招都work﹗當然有時佢都扭要，有時就要同佢講/同佢睇另外一些物件去引開佢注意力先得。不過瞓覺時間就難搞一點，因為我唔想半夜嘈醒老公，所以暫時我都有俾阿仔食，食咗就好快瞓著。(因為咁老公話我“慈母多敗兒”)

有了自己思想的小朋友又難搞多少少，出街時，叫佢同姨姨講byebye，佢會話“BB唔byebye呀﹗”咁媽媽問，“點解唔BYEBYE呀？”起初我問佢係咪見到SECURE姨姨驚呀？佢會話“係呀﹗喊呀﹗”後期少少，佢就會話“跳跳揸著車車，唔BYEBYE呀﹗”跟著個頭就立即擰開.... 唉﹗

但有時佢又會同自己的毛公仔講早晨、HELLO、BYEBYE﹗跟著我同佢講”跳跳小朋友好有禮貌啊﹗跳跳做得好好呀﹗”咁跳跳因為想我多稱讚佢，所以又會byebye多幾次，真係好好笑﹗

佢開始知道自己鍾意邊個，如果嗰個小朋友同佢玩，而跳跳又玩得好開心嘅話，佢就會話好鍾意呢個人，整日都會提著呢個人個名，又話要同佢玩；相反，有個小朋友對佢唔好，好似打佢、搶佢手上玩具，佢就會不停話“唔同xx玩呀﹗xx曳曳啊﹗”愛恨好清楚、簡單。

如廁方面，跳跳可以自己去廁所疴poo poo，基本上一急，佢就會叫“poo poo”，响屋企/旅行時嘅酒店就肯坐廁板，但就唔肯坐酒樓/街上廁格內的廁板。而小便方面，只有在沖涼時講shu shu, 而又真係疴倒，其他時間佢會講，不過就忍唔倒咁耐，唔夠十秒就撒尿，其實佢忍多一陣，我都可以抱佢坐廁板，應該可以訓練倒，不過都係慢慢來，小便呢樣嘢我諗著到出年天氣熱時再訓練，而家太凍，不宜除咗條褲仔企咁耐。

就快兩歲，我開始俾佢試街外的食品。因為佢有食品敏感(對豉油、味精特別敏感)，所以我會响呢個時候俾佢試下唔同品種的食物，當然唔可以太濃味，食清一點。跳跳巳經食過脆脆餅(bb餅)、維他奶、bb apple juice、麥記橙汁、少量薯條、雪糕，以上的食物可以俾佢食，但要節制，希望佢個腸胃仔慢慢適應，唔使等佢第時一食就有不良的反應。

跳跳响兩歲前巳經試過四次interview，四次裡面只有一次冇扭計，其他兩次就喊著唔in，一入門就講byebye，在interview時扭計、走時就笑，肯同老師講byebye、飛吻等...) 還有一次就半扭，我要俾著糖，"tum"著先唔喊，咁先完成倒一半指令。而家未知有冇書讀，但係响呢件事上面我學會了接受，我要接受阿仔係一個慢熱的小朋友，佢各成長方面好好，好多顏色、形狀、物件都識，認知方面都ok，我覺得佢唔係怕羞(因為响屋苑電梯同其他人打招呼、同人笑、同人講嘢；响地鐵跳舞，人地望著佢都唔怕)，而係玩性格，喜歡就喜歡，不喜歡就咩都冇得傾。我相信佢再大少少就會好好多，更何況而家只不過in pre-nursery，唔讀都得，咪等k1囉，所以每次佢in 得唔好，我都話，算啦，咪當一個經驗吧，呢樣嘢响佢人生只係a piece of cake，不必太耿耿於懷，我要相信我的孩子係得嘅﹗

[我又想講而家嘅幼稚園好癲，in 兩歲班就要咩都識，好似in k1咁，未夠兩歲，你想佢識咩？]

每月紀錄：
10/11 出席妹頭生日會

15/11 去海洋公園

搭cable car呀﹗

17/11 Joyful 幼稚園面試

18/11 dinner witb Nadege

29/11 出席太太生日晚宴

06/12 23個月大

07/12 兒科覆診

08/12 綠楊幼稚園面試

15/12 發燒，去法國醫院睇醫生

20/12 聖文嘉幼稚園面試

22/12 IFC 影相 + 1881 TEDDY BEAR 影相

去完IFC就搭電車去灣仔碼頭搭船過海。好好的親子活動呢﹗

跳跳跑去搭船﹗

再搭渡海小輪

去1881同TEDDY BEAR影相

大TEDDY呀﹗

24/12 仍然有鼻塞、流鼻水，法國醫院覆診

會所X'MAS GALA

25/12 大坳門放風箏，晚上home party

26/12 HK 交通工具遊
~地鐵 => 無蓋巴士 (人力車) => 電車 => 地鐵 => 小巴 => 的士

29/12 探望TWINS

1/1 同JOEY姐姐去動植物公園

6/1 兩歲生日PARTY

跳跳嘅成長記錄：

重量：12.4kg　(在醫院量，奀仔呀﹗)

身長：約84CM

食： 2奶2飯仔 (下午大量生果, 芝士, 餅乾)

試過嘅食物有：
肉類：瘦肉、鴨腎(味)、雞肉、牛肉、雞蛋(多數係豬肉／牛肉／雞肉蒸雞蛋/馬碲蒸豬肉/小蕃茄蒸豬肉等)。
魚方面只可食三魚，大眼雞，食其他魚，咀仔四周就起紅點，暫時都會停一停，好多魚都未得﹗
在晚會方面會好少少，會瘦肉粒/雞肉粒炒西蘭花，加三文魚；跳跳巳經唔食蒸節瓜，但節瓜切粒再炒肉碎，加豆腐、紅蘿蔔，咁就會食。跳跳已經長了牙仔，多肉我會切粒粒俾佢食，想佢學識咀嚼，增強口部肌肉活動。

菜類：菜心、黃椒、絲瓜、菠菜、紅蘿蔔、荷蘭豆、甜豆、青豆、粟米、西蘭花、節瓜、豆腐、牛油果、佛手瓜、洋蔥、淮山、茨實、椰菜花、馬碲、莧菜、青瓜、蕃茄、白蘿蔔、紅腰豆、芽菜、椰菜、蕃薯苗(食得好少) 、紅菜頭

生果：蘋果（蒸熱食/生食）、奇異果、大蕉、黃帝蕉、香蕉、啤梨、火龍果、提子、藍莓、木瓜、黃布林、橙／橙汁，士多啤梨、西莓、生蕃茄仔、枇杷果、西瓜、桃子。

小食：BB餅乾、白麵包、鮮奶包、甜包、子包蛋糕、BB YOGURT糖、馬拉糕、叉燒包(皮)、雪糕、羊奶片、維他奶、bb apple juice；當然跳跳乖我都會同佢去食麥記的開心樂園餐，食粟米、飲橙汁、QOO、少量薯條、雪糕等....yummy﹗

(某些蛋糕/麵包都巳經可以食到，我又試過俾COOKIES佢食，又得喎﹗)

而家唔多食BABY FOOD，ELLA果隻ORGANIC FRUIT，唔食，要食新鮮藍莓、提子等。

跳跳好肯飲水，開始用小杯仔飲水，有時又會用我地大人的杯飲水。而當我地開飯時，跳跳一定要跟我地一齊開飯，自已用BB筷子仔叉叉吓，叉到就自己放入口食。

湯水：淮山蓮子茨實花膠湯、蕃茄薯仔紅衫魚湯、蘋果雪梨湯、牛鰍魚淮山茨實湯、西洋菜湯、粟米紅蘿蔔栗子湯、節瓜魚尾湯、三文魚薯仔蕃茄湯、龍利葉鱷魚肉湯、海底椰湯、水鴨淮山蓮子茨實、冬瓜瘦肉湯、節瓜瘦肉湯、菊花水、火炭毛涼茶（只飲少少）、竹庶水、冬瓜粟米水、土伏苓袪濕湯、生魚花旗參湯、生魚蘋果湯、蕹菜馬碲土伏苓排骨湯、響螺頭淮山蓮子茨實煲雞、大眼雞蕃茄薯仔湯等等。

牙仔：下顎左右門牙(第一、二隻牙)　（約９個月大時出）　
　　　上顎左右門牙(第三、四隻牙)　（約１１個月大時出）
    上顎門牙兩傍(第五、六隻牙) (約13﹣14個月大時出)
上顎左小臼齒(第七隻牙)       (約14個月3週時出)
       下顎左右門牙傍(第八、九隻牙) (約15個月足先到牙洞)
   下顎左小臼齒(第十隻牙)       (約16個月足時出)
   上下顎右小臼齒(第十一、十二隻牙) (約16個月2-3週足時出)
   上顎左右犬齒(第十三、十四隻牙)       (約17個月時出)
下顎左犬齒(第十五隻牙)        (21個月大時出)
   下顎右犬齒(第十六隻牙)        (22個月大時出)

    今個月唔知點解又不停咁流口水，唔通出大牙？

跳跳作息時間表：
跳跳小朋友大個仔咗，又定時咗。早上約八時至九時起床，之後唔會再瞓，直到食完午飯，十二至一時就會瞓午覺，約睡兩至兩個半小時。由晩上到朝早就有約八至九個小時嘅睡眠時間；每日一至兩次poo poo；2奶、2飯、1小食等。其他時間就係玩、睇書同搞搞震﹗有時又會幫工人姐姐打掃、幫手搬叠好的衫到媽媽房。好似呢個聖誕節完結後，跳跳要幫我將棵聖誕樹放回床下底，有時佢都幾乖，值得一讚﹗