跳跳~15個月大－HeidiPeter1995的部落格

14個月大過後，跳跳都唔知响邊度學“尖叫”，不論開心、唔開心、滿意、唔滿意，一來就整聲尖叫妳嘆吓。如果佢唔鍾意某些事起上來，除了尖叫之外，就成條腰、連頭帶身一齊向後瞓，好似要從你手上玩“trust fall”咁，真係好難搞。我睇過一些文章，話bb而家未識控制自己嘅情緒，好多時尖叫都係想表達佢自己開心唔開心嘅感覺，佢都想知咁大聲叫四周嘅人會係點樣回應。所以如果响屋企可以同佢用低沉嘅聲音講話，咁可以略為緩和bb嘅情緒，令bb知唔使咁大聲媽媽都知道佢嘅需要。我沒有禁止阿仔尖咁叫，我只係話：bb你好大聲呀﹗媽媽聽到你講嘢啦，媽媽知道你想要咩，你可以細聲少少.....這個情況直到月尾(差一多到足15個月大就好好多，這時巳經沒有尖叫...但有其他聲音/行為代替)。不過，跳跳嘅脾氣大咗，唔鍾意見到嘅人就會“嗯”一聲拎開個面，就算你俾食物、玩具佢，佢都唔會理睬；如果佢想同你玩，佢就自然走埋你身叫你、同你講嘢，死未﹗(如果入學要面試時係咁我就暈响度﹗)

跳跳開始踏入模仿嘅階段，佢見到我地大人做咩，佢都開始學做。好似我地晚上開飯，我地用筷子夾餸，佢都要用筷子“叉”餸；跳跳會“爬”飯，咀巴會放在碗食嘢；我地用搖控(將個搖控對著電視/hifi)，佢都係咁樣做，佢“噤”制“噤”到藍畫面，佢就會將搖控俾我，要我“噤”返有畫面嘅模式。因為咁，多數我睇完新聞、睇一陣barney就關電視，等佢唔使亂噤電視，一來又可以同佢睇下書仔、玩下玩具咁。唔知係咪睇得barney多，佢開始哼歌仔、一齊做動作，而之前做唔到嘅“turn around”原地轉，佢都巳經識點轉。(原來小朋友唔係一開始就識轉圈，要身體手腳協調先得，起初我以為跳跳有問題，咩都唔識﹗)

呢幾個月開始跳跳都開始學發音，之前都聽到佢有意識咁講嘢，但都未知佢講咩，但今個月發到嘅音有：mama mama(有意識咁叫我)、dada dou....(叫豆豆，豆豆返到家，跳跳就會叫dada dada...)；車車(che)、果果(起初以為佢只係見到蘋果就叫果果，原來佢想食生果，不論橙、啤梨、蘋果都叫果果；冇(火車走咗佢會叫冇，食完/飲完，冇晒食物又叫“冇”；“ee-ee”姨姨(叫工人姐姐)。

而跳跳翻開書最鐘意睇嘅物件係：蘋果、救火車(要係紅色嘅fire engine)、貨車（車車都鍾意）、巴士、火車、波波、teddy bear、貓貓等等。

每月紀錄：

10／3 第一次搭天星小輪

17/3 到鰂魚涌公園玩

跳跳好似唔多鍾意玩千秋﹗

見到一個11個月大嘅B女，反而伏在我心口﹗

最鍾意行來行去﹗

18/3 ops parade (可能唔鍾意見到著制服嘅人，勁喊﹗)成日見唔倒媽媽，好可憐﹗
24/3 到西九龍文化廣場玩秋千，晩上到銅鑼灣警察俱樂部食飯，上落樓梯行不停

24／3 晚上到警察俱樂部食飯

笑成咁，睇黎足跳跳都係鍾意玩車車﹗

31/3 - 4/7 第一次出門去台灣旅行

＠東海大學

＠彩繪眷村

＠埔里紙教堂

＠誠品書店

＠十分，放天燈

＠國父紀念館

跳跳嘅成長記錄：

重量：約10~11kg　(自己在家量） (去完旅行後病咗，又好似瘦咗咁﹗大約都係10kg)

身長：75CM ，上身著80-90碼、褲仔著80碼，要睇牌子，有些牌子要買18-24個月的SIZE，不過褲仔就買12個月就啱了﹗

食： 1奶2飯仔1粉麵 (三點餐食abc粉、通心粉、星星粉、兒童麵、蕎麥麵、麵包、蕃薯等等，貝榖粉（唔like!)，試過麥皮加奶（最初都有食，但之後就唔食﹗）而飯就會加芝士，補番D鈣質。有時三點餐就會飲兩至三安100%的純牛奶，都OK，未有敏感情況。要食硬少少嘅飯，多d水都唔食，會buu出來﹗

*** 月頭開始食粒粒飯(都係多少少水嘅)，飯餸分開整，開飯時就好似大人咁餸加飯一啖啖咁食。但病嘅時候反而唔肯食飯，只食半碗，所以瘦了﹗之後俾番佢食杰粥，反而食得好好，中午食一碗半都得。

試過嘅食物有：
肉類：瘦肉、鴨腎(味)、雞肉、牛肉、雞蛋(多數係豬肉／牛肉／雞肉蒸雞蛋、、魚(三文魚、鯇魚腩、紅點魚、桂花魚、大眼雞、左口魚、青衣魚，冇敏感：但係斑魚一食就起紅點，口四周就敏感起來)
菜類：菜心、黃椒、絲瓜、菠菜、紅蘿蔔、荷蘭豆、甜豆、青豆、粟米、西蘭花、節瓜、豆腐、牛油果、佛手瓜、洋蔥、淮山、茨實、椰菜花、馬碲、莧菜、青瓜、蕃茄、草菇(勁敏感，成個咀仔紅晒，又抓得好利害，即停﹗)、白蘿蔔、紅腰豆；今個月試咗：芽菜、椰菜、蕃薯苗(食得好少) 但OK，冇事﹗
生果：蘋果（蒸熱食/生食）、奇異果（有時食完都會有少少敏感）、大蕉(牛奶蕉、香蕉都會有敏感徵狀)、啤梨、火龍果、提子、藍莓、木瓜、黃布林、橙／橙汁，士多啤梨（都係有少少敏感，咀仔四周變紅）、今個月試咗：西莓、生蕃茄仔、枇杷果，全部ok
小食：BB餅乾、白麵包、提子包（不過唔係好ＬＩＫＥ）、子包蛋糕、BB YOGURT糖等。試過有機嘅rice cake，跳跳好鍾意食，但係食得太多，熱氣到佢不停咁抓自己、個人好燥熱、好燘﹗要飲開奶茶、竹庶水、冬瓜粟米水先得﹗

今個月都試咗市面上嘅BABY FOOD，有錫紙包裝烏冬、即食飯仔、蒸蛋糕等。全部都沒有敏感情況。但佢唔係樣樣都食，好似bb 肉醬意粉、bb yogurt、牛肉味嘅餸、有肉桂味嘅baby food都唔食﹗婆婆話食阿麻籽加茅屋芝士對跳跳嘅皮膚好嘅幫助，即管試下，不過...沒有太大同明顯的幫助。

而每餐開始俾兩種唔同嘅瓜菜，希望佢唔會有便秘嘅情況，而家每日大約有一至兩次便便，但有時會兩日一次（食咗好多生果、飲好多水都係咁）。跳跳好肯飲水，自己玩玩下都會自己攞杯仔飲水，巳經給跳跳換咗有飲管的學習杯，啜啜吓都OK ﹗有時又會用飲管飲紙包飲品。而當我地開飯時，跳跳一定要跟我地一齊開飯，自已用BB筷子仔叉叉吓，叉到就自己放入口食。

湯水：淮山蓮子茨實花膠湯、蕃茄薯仔紅衫魚湯、蘋果雪梨湯、牛鰍魚淮山茨實湯、西洋菜湯、粟米紅蘿蔔栗子湯、節瓜魚尾湯、三文魚薯仔蕃茄湯、龍利葉鱷魚肉湯、（花膠湯都係有敏感）、水鴨淮山蓮子茨實、冬瓜瘦肉湯、節瓜瘦肉湯、菊花水、火炭毛涼茶（只飲少少）、竹庶水、冬瓜粟米水等等。

呢個月食咗保嬰丹(見佢有打噴嚏，即刻食﹗)、吳德物次水(舒緩佢出牙仔時的不適及瞓得唔好都得)、珍珠未(瞓得唔好同熱氣)、開奶茶、七星茶等

牙仔：下顎左右門牙(第一、二隻牙)　（約９個月大時出）　
　　　上顎左右門牙(第三、四隻牙)　（約１１個月大時出）
上顎門牙兩傍(第五、六隻牙) (約13﹣14個月大時出) ~~~勁多口水，一日十多條口水堅﹗
上顎左小臼齒(第七隻牙) (約14個月3週時出)
下顎左右門牙傍(第八、九隻牙) (約15個月足先到牙洞)